«Հանդիպումների վայրով պայմանավորված՝ էլի ջղաձգվել են և փորձում են սրել իրավիճակը, գալ խոսել ծեծված թեմաներով և և հետո թողնել գնալ»:
Այս մասին այսօր ԱԺ-ում հայտարարությունների ժամին ասաց «Քաղաքացիական պայմանագիր» խմբակցության քարտուղար Արթուր Հովհաննիսյանը՝ անդրադառնալով ընդդիմության ելույթներին ԱՄՆ-ում ընթացքող եռակողմ բանակցությունների վերաբերյալ:
Հովհաննիսյանը նկատեց. «Շատ ծիծաղելի է, երբ, օրինակ, մի մարդ (տպավորություն է, որ բեղ են պահել, որ չճանաչեն, ով կերել է մանկատան երեխաների տների փողերը՝ բոլոր հնարավոր լուրերի համաձայն), գալիս է այստեղ և ասում՝ «ով որ թուլացրել է բանակը, դավաճան է, նա պետք է պատժվի, ով որ պետության հիմքերն է խարխլել, նա պետք է պատժվի, նա պետք է այստեղ չլինի»: Բա դուք ստեղ ի՞նչ գործ ունեք, որ ըտենց տեքստեր եք ասում»:
Պատգամավորը նշեց, որ մասնավորապես «Հայաստան» խմբակցության պատգամավորների այսօրվա ելույթների տեքստերը, եթե իրականություն դառնային, չգիտի, թե նրանք լավագույն դեպքում որտեղ էին լինելու, սակայն ԱԺ-ում հաստատ չէին լինելու:
«Կամ «Պատիվ ունեմ» խմբակցության քարտուղարը սովորություն է սարքել, գալիս այստեղից հայտարարում է՝ «ՀՀ իշխանությունները հող են նախապատրաստել Ադրբեջանի ագրեսիայի համար»: Ասենք՝ սենց արտահայտություն անողը պետք է մինիմում ադրբեջանական ազգանունով լիներ: Մտածեք, նոր խոսեք: Եվ, առհասարակ, տպավորություն է, թե ընդդիմադիրները գալիս են, այստեղից ինչ ուզում, ինչ մտքերին փչում է, խոսում են: Քանի որ նեռվի չափաբաժինը տեղից էլ շատ է, ես խորհուրդ եմ տալիս քաղաքացիներին՝ հենց ընդդիմադիր պատգամավորների եք տեսնում ձեր հեռուստաէկրաններին, պարզապես փոխեք հեռուստաալիքը և շարունակեք ձեր կյանքը, քանի որ նրանց ելույթների հիմնական նարատիվները կառուցված են ստի և կեղծիքի վրա»,- ասաց Հովհաննիսյանը
Վերջինս շեշտեց՝ ՀՀ իշխանություններն օրնիբուն շարունակում են իրենց աշխատանքը ՀՀ սահմաններին խաղաղություն ապահովելու, Արցախի ժողովրդի իրավունքները պաշտպանելու համար. «Եվ կապ չունի՝ աշխարհի որ կետում մենք կպաշտպանենք մեր պետության և մեր Արցախի հայրենակիցների իրավունքները, կլինի՝ ԱՄՆ-ում, Մոսկվայում, Բրյուսելում, թե, օրինակ, Սինգապուրում»:
