Շիրակի մարզպետ Մուշեղ Մուրադյանը այսօր ամփոփել է իր պաշտոնավարման 100 օրը։
Մարզպետը լրագրողների հետ հանդիպմանը ներկայացրել է քաղաքաշինության, գյուղատնտեսության, կրթության և առողջապահության ոլորտների աշխատանքներն ու նախատեսված ներդրումների ծավալը։ Ըստ Մուշեղ Մուրադյանի՝ այս տարի ավելացել է քաղաքաշինության ոլորտին կառավարության կողմից տրամադրված ֆինանսավորումը։ 22,1 միլիարդդրամից 13,5 միլիարդը կտրամադրվի մարզի հանրապետական,միջպետական ու մարզային նշանակության շուրջ 60 կմ ճանապարհների հիմնանորոգմանը, 4,5 միլիարդը կուղղվի կրթական,մշակութային և մարզական նշանակության օբյեկտների կառուցման և հիմնանորոգման նպատակով։
Մուշեղ Մուրադյանը անդրադարձել է նաև մարզում երրորդ և չորորդ կարգի 114 վթարային շենքերի խնդրին,որոնցում բնակվում են 1961 ընտանիքներ։ Դրանցից երկուսի՝ Անտառավան 26 և Տիգրան Մեծի 5 շենքերի բնակիչների հարցը այս տարի կլուծվի,բայց այս հարցում տարբեր են մոտեցումները։
Օրակարգում շարունակում է մնալ ԲԳՎ-ն։ Վթարային շենքերից բացի, Գյումրիում շարունակում է խնդրահարույց մնալ տնակների ապամոնտաժման հարցը։ Կառավարության որոշմամբ՝ մինչև 2027 թվականը համայնքապատկան տարածքները պետք է ազատվեն ժամանակավոր կացարաններից։ Ըստ Մուրադյանի՝ այժմ քննարկվում է անօթևան ընտանիքներին կացարաններով ապահովելու տարբերակները։
Ըստ մարզպետի՝ 2023-ին քաղաքաշինության բնագավառում պետական բյուջեով և այլ ֆինանսական աղբյուրներով մայիսի 1-ի դրությամբ եղած տվյալներով կիրականացվի 22,1 մլրդ դրամի կապիտալ ներդրում։
Շուրջ 4,5 մլրդ դրամ կուղղվի կրթական, մշակութային և մարզական 16 օբյեկտների կառուցման և հիմնանորոգման նպատակին, 3 մլրդ դրամ բնակարանաշինությանը, 1 մլրդ դրամի մասնավոր ներդրումներ են կանխատեսվում, 100 մլն դրամի էլ նախագծային աշխատանքներն են։
