ԱԺ «Հայաստան» խմբակցության ղեկավար, պաշտպանության նախկին նախարար Սեյրան Օհանյանն անդրադարձել է այսօր առավոտյան հայ-ադրբեջանական սահմանին տեղի ունեցած փոխհրաձգությանը։ Նրա խոսքով, պաշտոնական տեղեկատվությանը հետևելիս այն եզրակացության են եկել, որ հայկական բանակը պատասխանել է ադրբեջանական սադրանքին։
Խոսելով սադրանքի պատճառների մասին, Օհանյանն ասել է. «Ադրբեջանը երևի թե նպատակ է ունեցել հերթական անգամ այս կամ այն հատվածում իր դիրքերի դասավորվածության մեջ բարելավում իրականացնել: Իսկ ռազմավարական նպատակը ՀՀ-ի վրա ազդելն է շարունակական ճնշումները հաջորդական դարձնելը, որպեսզի բանակցային գործընթացում կամ հայ-ադրբեջանական հարաբերություններում իրենք մշտապես հանդես գան առավելապաշտության և հաղթողի դիրքից: Իրենց նպատակը Հայաստանի վրա ճնշումներն են և Արցախի շուրջ օղակը սեղմելն է:
Եթե սա տեղի է ունենում բանակցային գործընթացին զուգահեռ, սա ևս մեկ անգամ խոսում է այն մասին, որ Ադրբեջանի քաղաքականությունը մեր նկատմամբ չի փոխվել: Յուրաքանչյուր բանակցության փուլին զուգահեռ, դրանից առաջ, հետո, կամ ընթացքում իրենք ուժային ճնշումներ ու սադրանքներ են կազմակերպում, որպեսզի բանակցությունների ընթացքում մենք գնանք զիջումների: Փառք Աստծո, երբ բանակը ցույց է տալիս ուժ, իրենք բանակցություններում հաջողություններ չեն կարող ունենալ»։
Ըստ Օհանյանի, այս սադրանքի նպատակը և դիրքային բարելավում ստանալն էր, և Սոթքի հանքին ամբողջությամբ տիրանալը. «ՀՀ իշխանությունները պետք է ամեն ինչ անեն, որ առաջընթացով գործեն: Որոշումների ընդունման մեջ կանխարգելիչ միջոցառումներն անհրաժեշտություն են»:
