Հայաստանի արտգործնախարար Արարատ Միրզոյանը մեկնել է Մոսկվա. այս մասին տեղեկացրել է ՀՀ վարչապետ Նիկոլ Փաշինյանը՝ կառավարության նիստում անդրադառնալով Հայաստանի ու Ադրբեջանի ԱԳ նախարարների՝ մայիսի 19-ին կայանալիք հանդիպմանը։
«Ռուսական կողմից ստացել ենք առաջարկ՝ մայիսի 25-ին Մոսկվայում ՌԴ նախագահի միջնորդությամբ բարձրագույն մակարդակով եռակողմ հանդիպում անցկացնել, և մենք ընդունել ենք այդ առաջարկը»,- ասել է Փաշինյանը։
Նրա խոսքով՝ Ֆրանսիայի նախագահի և Գերմանիայի կանցլերի մասնակցությամբ հնգակողմ հանդիպում էլ սպասվում է հունիսի 1-ին՝ Քիշնևում. «Նման հնգակողմ հանդիպում նախատեսված է նաև հոկտեմբերին՝ Գրանադայում։ Բրյուսելում հաջորդ եռակողմ հանդիպումը նախատեսված է հուլիսին»,- ասել է նա։
Փաշինյանը նաև ասել է, որ, ի հեճուկս բանակցություններում արձանագրված որոշակի առաջընթացի, Ադրբեջանը շարունակում է էսկալացիոն քաղաքականություն վարել Հայաստանի սահմանին։
