Ադրբեջանի ԱԳՆ-ն անդրադարձել է Արարատ Միրզոյանի հայտարարությանը

Ադրբեջանի ԱԳ նախարարությունը անդրադարձել է Հայաստանի ԱԳ նախարար Արարատ Միրզոյանի՝ երեկ Բրիտանիայի Եվրոպայի հարցերով նախարար Լեո Դոքերթիի հետ համատեղ ասուլիսի ժամանակ արած այն հայտարարությանը, որ Ադրբեջանը Լաչինի միջանցքի ապօրինի արգելափակմամբ էթնիկ զտման է ենթարկում ղարաբաղցիներին․

«Գործընկերոջս հետ քննարկման ժամանակ շեշտել եմ, որ միջանցքի արգելափակումը լուրջ հումանիտար խնդիրներ է առաջացրել Լեռնային Ղարաբաղում, այդ թվում՝ ԼՂ մուտք ունեցող միակ միջազգային կազմակերպության՝ «Կարմիր խաչի» բնականոն գործունեության համար խոչընդոտների տեսքով:

Ակնհայտ է, որ այդ արգելափակումը Լեռնային Ղարաբաղում էթնիկ զտումների քաղաքականության մաս է»։ Ադրբեջանի ԱԳ նախարարությունն, ի պատասխան գրել է. «Կոչ ենք անում Հայաստանին՝ զերծ մնալ տարածաշրջանում խաղաղության և անվտանգությանը վնասող վտանգավոր հռետորաբանությունից, Ադրբեջանին անհիմն մեղադրելու փոխարեն կատարել ստանձնած պարտավորությունները և դադարեցնել միջազգային հանրության ուշադրությունը շեղելու փորձերը»։

«Հայաստանը դեռևս խրախուսում է միջազգային առաքելության ուղարկումը Ադրբեջանի տարածք, խոչընդոտում է Ադրբեջանի կառավարության երկխոսությունը Ադրբեջանի Ղարաբաղի շրջանում բնակվող հայ բնակիչների հետ, և դա դիտվում է որպես միջամտություն Ադրբեջանի ներքին գործերին։

Եթե ​​Հայաստանը տարածաշրջանում խաղաղության և անվտանգության կողմնակից է, պետք է դադարեցնի նման միջամտությունները», – հավելել է Ադրբեջանի ԱԳ նախարարությունը։