Իրավապաշտպան կազմակերպությունների և ՏՏ անվտանգության փորձագետների համատեղ հետաքննությունը պարզել է, որ առնվազն տասներեք հայ հասարակական գործիչ և պաշտոնյա, այդ թվում՝ լրագրողներ և իրավապաշտպաններ, 2020թ․ նոյեմբերից մինչև 2022թ․ ենթարկվել են «Pegasus» լրտեսական ծրագրի հարձակմանը։ Access Now, Citizen Lab-ի, բջջային անվտանգության հետազոտող Ռուբեն Մուրադյանի, CyberHUB-AM-ի և Amnesty International-ի անվտանգության լաբորատորիայի համատեղ հետաքննությունը ցույց է տալիս, որ հայ-ադրբեջանական հակամարտությունը կարող էր լինել նման հսկողության պատճառը:

Amnesty International-ի անվտանգության լաբորատորիան վարակ է հայտնաբերել «Ազատ Եվրոպա/Ազատություն» ռադիոկայանի հայկական ծառայության երկու թղթակիցների՝ Կառլեն Ասլանյանի և Աստղիկ Բեդևյանի սարքերում։ Մյուսներն են ԼՂ նախկին ՄԻՊ Ռուբեն Մելիքյանը, Հայաստանի ԱԺ նախկին պատգամավոր Սամվել Ֆարմանյանը, Հայաստանի նախկին ՄԻՊ Քրիստինե Գրիգորյանը, թուրքագետ Վարուժան Գեղամյանը, Հայաստանի ԱԳՆ նախկին խոսնակ Աննա Նաղդալյանը և ևս 6 անձ, որոնք ցանկացել են անանուն մնալ։ 

«Այս հետաքննությունն ընդգծում է Հայաստանում և Ադրբեջանում քաղհասարակությանն ուղղված լրտեսող ծրագրերի սպառնալիքների լրջությունը: Իշխանությունները պետք է դադարեցնեն խոսքի ազատությունը ճնշելու բոլոր փորձերը և երկու երկրներում բացահայտված Պեգասուսի հարձակումների վերաբերյալ անցկացնեն անկախ ու թափանցիկ հետաքննություն», – ասել է Amnesty International-ի անվտանգության լաբորատորիայի ղեկավար Դոննա Օ’Քերոլը:

Ադրբեջանի պարագայում խոսքը գնում է շուրջ 1000 հոգու գաղտնալսման մասին, որոնց թվում է «Ազատություն» ռադիոկայանի ադրբեջանական ծառայության նախկին թղթակից Խադիջա Իսմայիլովան։ Amnesty International-ը ապացույցներ է ստացել, որ Intellexa-ի կողմից մշակված մեկ այլ լրտեսական ծրագիր՝ Predator-ը, տեղակայվել է Հայաստանում տեղակայված սերվերային ենթակառուցվածքներում: Meta-ի անվտանգության հետազոտողները հայտնաբերել են նաև Հայաստանում Predator-ի հավանական հաճախորդին։