Օլիմպիական չեմպիոն, աշխարհի եռակի, Եվրոպայի քառակի չեմպիոն հունահռոմեական ոճի ըմբիշ Արթուր Ալեքսանյանը (97կգ) Հայաստանում բժշկական հետազոտություն է անցնելու: Այս մասին «Հայկական ժամանակ»-ի հետ զրույցում ասաց նրա եղբայրը՝ Ռաֆայել Ալեքսանյանը: Մարզիկը Հայաստան է վերադառնալու վաղը՝ սեպտեմբերի 18-ին: Հետազոտվելուց հետո որոշվելու է՝ ինչպես եւ որտեղ է բուժելու վնասվածքը:
Ալեքսանյանը կողի կոտրվածք էր ստացել Նուր-Սուլթանում ընթացող աշխարհի 2019թ. առաջնության ընթացքում՝ սեպտեմբերի 15-ին կայացած գոտեմարտերից մեկի ժամանակ: Ինչպես Ռաֆայել Ալեքսանյանը նշեց, հիմա եղբայրը դժվարությամբ է շնչում:
Արթուր Ալեքսանյանը դուրս էր եկել Ղազախստանում ընթացող աշխարհի առաջնության եզրափակիչ, որը պետք է կայանար երեկ, բայց չկարողացավ մասնակցել այդ վնասվածքի պատճառով: Հավաքականի մարզիչ Սամվել Գեւորգյանը նշում էր՝ անհանգստանալու կարիք չկա, Արթուրը պատրաստ է գորգ դուրս գալ, սակայն մյուս կողմից էլ ընդգծում էր, որ բժիշկների հետ խորհրդակցելուց հետո իրենք նոր որոշում կկայացնեն:
Ավելին՝ armtimes.com