Նիդերլանդներում հայկական կազմակերպությունների ֆեդերացիան շնորհակալություն է հայտնել Նիդերլանդների պատգամավորներ Նիկո Դրոսթին և Պիետեր Օմցիգտին՝ հունիսի 29-30-ին կայանալիք Եվրոպական գագաթաժողովի քննարկումների ժամանակ Նիդերլանդների խորհրդարանում Լեռնային Ղարաբաղի իրավիճակը ներկայացնելու համար:

Վարչապետ Ռուտեն, անդրադառնալով Ադրբեջանին ուղղված բազմաթիվ կոչերին՝ հետևել Արդարադատության միջազգային դատարանի որոշումներին և ապահովել Լաչինի միջանցքով քաղաքացիների ազատ տեղաշարժը, սա համարել է կարևոր կետ: Նա ընդգծեց նախագահ Շառլ Միշելի ներգրավվածության կարևորությունը Լեռնային Ղարաբաղի հակամարտության կարգավորման գործընթացում: Հուլիսին այդ հարցը նա քննարկելու է երկու կողմերի հետ: Պարոն Ռուտեն աջակցություն է հայտնել ԵՄ-ի ջանքերին՝ ուղված երկու ներգրավված կողմերի հետ երկխոսությանն ու շփումների պահպանմանը։ Նրա խոսքով՝ Նիդերլանդները ևս օգտագործում է բոլոր հնարավորությունները՝ դա անելու համար: Ըստ պարոն Ռուտենի՝ առաջին քայլը Լաչինի միջանցքի շրջափակումը վերացնելն է:

Պատգամավոր Պիետեր Օմցիգտը նշել է, որ, միջանցքը բացելու փոխարեն, Ադրբեջանն այժմ այնտեղ անցակետ և բետոնե բլոկներ է տեղադրել՝ միտումնավոր փորձելով հասնել նրան, որ Լեռնային Ղարաբաղը ամբողջովին կտրվի աշխարհից, և բոլորն ականատես լինեն Լեռնային Ղարաբաղի փլուզմանը: Պիետեր Օմցիգտը բարձրացրել է միջազգային հանրության, այդ թվում՝ ԵՄ-ի քայլերի հարցը՝ ի կատար ածելու ՄԱԿ-ի Միջազգային դատարանի որոշումը և վերջ դնելու այս անօրինական շրջափակմանը։

Վարչապետ Ռուտեն կրկին ընդգծել է երկու կողմերի ներգրավվածությամբ առաջիկա հանդիպման կարևորությունը նախագահ Միշելի հետ՝ որպես երկխոսության և հնարավոր առաջընթացի կարևոր միջոց։ Վարչապետ Ռուտեն ձեռնպահ մնաց հետագա տարբերակների մատնանշումներից՝ նախագահ Միշելին ընդգծելով քննարկումներն արդյունավետ կառավարելու հնարավորություն տալու կարևորությունը։ Ըստ նրա, սակայն, երաշխիք չկա, որ դա կաշխատի: Նա համաձայն է, որ իրավիճակը ծանր է և ունի հեռահար հետևանքներ՝ Լեռնային Ղարաբաղում կյանքի որակի, ինչպես նաև տարածաշրջանի այդ հատվածի ապագայի առումով։

Ամփոփելով՝ Պիետեր Օմցիգտն ասել է, որ Ադրբեջանը ձգձգելու է իրավիճակն այնքան ժամանակ, քանի դեռ չի հասել իր ուզածին։ 

Ավելի վաղ քննարկվել են ձեռնարկվելիք միջոցառումներն ու դրանց ժամկետները։