Արայիկ Հարությունյանը միանում է նստացույցին

«Արցախի քաղաքացիների, մեքենաների ու բեռների տեղաշարժի խոչընդոտները, վերջին մեկ ամսվա ընթացքում նույնիսկ հումանիտար բեռների մատակարարման ամբողջական արգելքը, գազամատակարարման և էլեկտրամատակարարման պարբերական խաթարումները, պարբերական ռազմական ագրեսիան և սադրանքները, հոգեբանական ահաբեկչությունը նպատակ ունեն ճնշելու Արցախի ժողովրդի ազատ կամքն ու ինքնորոշման իրավունքը, բռնի կերպով հպատակեցնելու նրան և վերջին հաշվով հանգեցնելու էթնիկ զտման»,- այսօր ուղիղ կապով արված հայտարարության ժամանակ ասաց Արցախի Հանրապետության նախագահ Արայիկ Հարությունյանը:

Նա նշեց, որ Արցախի ժողովուրդն ու իշխանությունները բազմիցս արտահայտել են իրենց դիրքորոշումները և առանձնացրեց մի քանի սկզբունքային դրույթներ:

«Առաջին՝ մենք պայքարում ենք մեր սեփական հայրենիքում արժանապատիվ կյանքի և ինքնորոշման անօտարելի իրավունքի ճանաչման պաշտպանության համար, իսկ այդ իրավունքը բնական է և ենթակա չէ սակարկման և զիջման:

Ադրբեջանում տիրող հայ ժողովրդի հանդեպ էթնիկ ատելության համակարգային քաղաքականության պայմաններում հատկապես Արցախի հայերը կանգնած են ֆիզիկական ոչնչացման իրական սպառնալիքի առջև»,-հայտնեց Հարությունյանը:

Նա հայտարարեց, որ միանում է Ստեփանակերտի վերածննդի հրապարակում ընթացող նստացույցին։