ՌԴ ԱԳ փոխնախարար Անդրեյ Ռուդենկոն Ադրբեջանի դեսպան Փոլադ Բյուլբյուլօղլուի հետ հանդիպմանն ընդգծել է, որ Մոսկվան միշտ հարգել է Ադրբեջանի Հանրապետության տարածքային ամբողջականությունը։ Այս մասին ասվում է ՌԴ ԱԳՆ-ի՝ երկուշաբթի օրը տարածած հաղորդագրության մեջ։
Ավելի վաղ Ադրբեջանի ԱԳՆ-ն հայտարարել էր, որ Ռուսաստանի ԱԳՆ՝ հուլիսի 15-ի հայտարարությունը Ղարաբաղում իրավիճակի վերաբերյալ չի համապատասխանում երկու երկրների միջև դաշնակցային համագործակցության մասին հռչակագրին։
«Ռուսաստանի ԱԳՆ-ի՝ 2023 թվականի հուլիսի 15-ի հայտարարության վերաբերյալ Ադրբեջանի ԱԳՆ ոչ ճիշտ մեկնաբանությունների կապակցությամբ ընդգծվել է, որ Ռուսաստանի Դաշնությունը միշտ հարգել և հարգանքով է վերաբերվել Ադրբեջանի Հանրապետության տարածքային ամբողջականությանը, լիովին հավատարիմ է դաշնակցային համագործակցության մասին երկկողմ հռչակագրի ոգուն և տառին, միևնույն ժամանակ, դա չի վերացնում հայ-ադրբեջանական հարաբերությունների կարգավորման գործընթացը համակողմանիորեն խթանելու, օրակարգային բոլոր հարցերի լուծումը, այդ թվում՝ ապահովելու Լեռնային Ղարաբաղի հայ բնակչության իրավունքները և անվտանգությունը՝ բացառապես խաղաղ քաղաքական և դիվանագիտական մեթոդներով»,- ասվում է ՌԴ ԱԳՆ հաղորդագրության մեջ:
Հանդիպմանը կողմերը քննարկել են իրավիճակը Հարավային Կովկասում և Բաքվի և Երևանի հաշտեցման գործընթացը։
«Ռուսական կողմը հաստատել է Լաչինի միջանցքի ամբողջական և անհապաղ ապաշրջափակման, 2020 թվականի նոյեմբերի 9-ի եռակողմ հայտարարության համաձայն դրա երկայնքով երկու ուղղություններով տրանսպորտային կապերի վերականգնման անհրաժեշտությունը, ինչպես նաև Լեռնային Ղարաբաղի կենսապահովման նորմալ պայմաններ ստեղծելու անհրաժեշտությունը»,- նշել են ՌԴ ԱԳՆ-ում։
Նաև նշվում է, որ ռուսական կողմը վերահաստատել է իր պատրաստակամությունը մոտ ապագայում Մոսկվայում կազմակերպել արտգործնախարարների եռակողմ հանդիպում՝ քննարկելու ամենաբարձր մակարդակով պայմանավորվածությունների իրականացման ուղիները, այդ թվում՝ խաղաղության պայմանագրի համաձայնեցման հարցը:
«Դրան կհաջորդի Ռուսաստանի, Ադրբեջանի և Հայաստանի ղեկավարների գագաթնաժողովը Մոսկվայում՝ ստորագրելու նշված փաստաթուղթը»,- ընդգծել են դիվանագիտական գերատեսչությունում։
