Առաջիկա օրերին մեր միջազգային գործընկերները կժամանեն Երևան՝ քննարկելու Երևանի ճանապարհային երթևեկության խնդիրները և սկսելու աշխատանքը՝ դրանց լուծելու ուղղությամբ։ Այս մասին գրել է «Ապրելու երկիր» կուսակցության նախագահ, Երևանի քաղաքապետի թեկնածու Մանե Թանդիլյանը։
«Ճանապարհային երթևեկության խնդիրներն ամեն օր ուղեկցում են մեզ։
Խցանումներ, օդի աղտոտվածություն, վթարներ, վիրավորներ, մահեր…Այս խնդիրները տարեցտարի շատանում են, լուծումներն էլ՝ բացակայում։
Յուրաքանչյուր դեպքից հետո հիշում ենք այս մասին ընդամենը մի քանի օր և շարունակում ապրել նույն վիճակում»,- գրել է նա։
Ըստ նրա՝ ճանապարհային երթևեկության խնդիրների կարգավորումը լուրջ վերլուծությունների և աշխատանքի կարիք ունի և «մենք չենք նախատեսել այս հարցին անդրադառնալ սիրողական մակարդակով, այլ արդեն մի քանի ամիս է քննարկումներ ենք ունենում միջազգային հեղինակավոր կառույցների հետ, որոնք ունեն լուրջ փորձ նման խնդիրների կարգավորման մասով»։
«Մեզ համար շատ կարևոր է նաև “Vision O” հայեցակարգի ներդրումը, որը նպատակ ունի ավտովթարներից մահացության թիվը հասցնել 0-ի:
Առաջիկա օրերին մեր միջազգային գործընկերները կժամանեն Երևան՝ քննարկելու Երևանի ճանապարհային երթևեկության խնդիրները և սկսելու աշխատանքը՝ դրանց լուծելու ուղղությամբ։
Նախնական քննարկման համաձայն՝ ընդամենը մեկ տարի հետո Երևանի ճանապարհային երթևեկությունը բոլորովին այլ մակարդակի ենք բարձրացնելու՝ զերծ այսօրվա խցանումներից, հարյուրավոր վիրավորներից և զոհերից»,- գրել է Թանդիլյանը։
