«Իտալական լրատվամիջոցին տված հարցազրույցում Հայաստանի վարչապետ Նիկոլ Փաշինյանի հայտարարությունները Ռուսաստանի մասին անընդունելի տոնով են․ Մոսկվայում ծայրահեղ դժգոհ են», – այս մասին ՏԱՍՍ-ին հայտնել է ռուսական դիվանագիտական աղբյուրը։
«Մոսկվան չափազանց դժգոհ է Հայաստանի ղեկավարության վերջին հրապարակային հայտարարություններից, մասնավորապես, իտալական «La Repubblica» թերթին տված հարցազրույցում Հայաստանի վարչապետի հայտարարություններից և օգոստոսի 31-ին Հայաստանի ԱԳՆ-ի մեկնաբանությունից. դրանք անընդունելի են իրենց տոնայնությամբ և բովանդակությամբ ու սեփական սխալների պատասխանատվությունը Ռուսաստանի վրա դնելու ակնկալիքով»,- ասել է աղբյուրը։
«Իրականում, Արևմուտքը փորձում է արհեստականորեն դուրս մղել Ռուսաստանին Հարավային Կովկասից՝ օգտագործելով Երևանը որպես այդ նպատակին հասնելու միջոց։ Ռուսաստանը, որպես Հայաստանի ամենամոտ հարևան և բարեկամ, մտադիր չէ հեռանալ տարածաշրջանից։ Սակայն դա պետք է լինի երկկողմանի․ Հայաստանը ևս չպետք է դառնա Արևմուտքի գործիքը», – ասել է աղբյուրը։
