Ադրբեջանի արտգործնախարար Ջեյհուն Բայրամովը հարցազրույց է տվել «AzerTac» գործակալությանը, որտեղ անդրադարձել է Լեռնային Ղարաբաղի հիմնախնդրին, բանակցային գործընթացին և Ադրբեջանի դիրքորոշումներին։
Բայրամովը, մասնավորապես, հայտարարել է. «Տարեսկզբին Ադրբեջանի նախագահի կողմից նշանակված հատուկ ներկայացուցիչը հայ բնակչության վերաինտեգրման վերաբերյալ առաջին հանդիպումն անցկացրեց Ղարաբաղում, որից հետո, որպես յուրատեսակ «ռոտացիա», հրավեր ուղարկեցինք, որ հաջորդ հանդիպումը տեղի ունենա Ադրբեջանի քաղաքներից մեկում։ Հայ բնակչության ներկայացուցիչների ուշադրությանն է արժանացել նաև, որ կենտրոնական իշխանության ներկայացուցիչը պատրաստ կլինի շարունակել հետագա հանդիպումները նույն ռոտացիոն ձևաչափով. երրորդ հանդիպումը՝ կրկին Ղարաբաղում, չորրորդը՝ ադրբեջանական քաղաքներից մեկում, հինգերորդը նորից Ղարաբաղում, և այդպես շարունակ։
Մեզ համար կարևոր էր, որ գործընթացը շարունակվեր, և այս առումով Բաքուն դրսևորեց բարի կամք և բաց կեցվածք երկխոսության համար։ Սա է առաջ գնալու միակ ճանապարհը։ Միակ ճանապարհը երկխոսությունն է և ապագայի քննարկումն Ադրբեջանի կազմում։ Ուրիշը պարզապես չկա, քանի որ մնացած ամեն ինչ անօրինական է։ Սա մեր կարմիր գիծն է. Ադրբեջանի տարածքում գորշ գոտիներ այլևս չեն լինի», – հավելել է Բայրամովը։
