Պորտուգալիայում «Եվրոպական տարածաշրջանում առողջապահական համակարգերի ապագան թվային դարաշրջանում» խորագրով ԱՀԿ երկրորդ գիտաժողովի շրջանակներում նախատեսված էր նաև նախարարական պանելային քննարկում, որի ժամանակ ՀՀ առողջապահության նախարար Անահիտ Ավանեսյանը ներկայացրել է առողջապահության թվայնացման Հայաստանի փորձը:
Հայաստան կատարած այցի ժամանակ թվայնացման առաջընթացն արձանագրել էր նաև ԱՀԿ եվրոպական տարածաշրջանային գրասենյակի առողջապահական քաղաքականության և համակարգերի տնօրեն Նատաշա Ազոպարդի-Մուսկատն, ով այդ մասին նշել էր իր խոսքում և խնդրել մյուս երկրների հետ կիսվել Հայաստանի հաջողության բանաձևով:
«Նշել եմ, որ մենք կարիք ունենք մշտապես ուժեղացնելու մեր բուժաշխատողների և պացիենտների գիտելիքները` թվային տեխնոլոգիաները նրանց համար դարձնելով ավելի հասանելի և կիրառելի իրենց աշխատանքում: Ներկայացրել եմ նաև թվայնացման գործընթացում բուժաշխատողների և պացիենտների ներգրավման մեր փորձը, մեր առաջիկա թիրախներն ու խնդիրները, որոնց վերաբերյալ ծավալվեց հագեցած քննարկում»,- Ֆեյսբուքի իր էջում գրել է Ավանեսյանը:
