Պաշտպանության փոխնախարար Արման Սարգսյանը ԱԺ ութերորդ գումարման վեցերորդ նստաշրջանում ներկայացրեց 2019 թվականին ստորագրված ՀՀ կառավարության և Չեխիայի Հանրապետության կառավարության միջև ռազմատեխնիկական համագործակցության մասին համաձայնագիրը վավերացնելու մասին օրենքի նախագիծը:
Ինչպես նշեց փոխնախարարը, համաձայնագրով սահմանվում են համագործակցության ուղղությունները, որոնք ներառում են ռազմական նշանակության արտադրանքի արտադրության, ներմուծման, արտահանման, լիցենզավորման, որակի նկատմամբ հսկողության ապահովման, անհրաժեշտ մասնագետների և տեխնիկական անձնակազմի պատրաստման գործընթացին առնչվող հարցեր:
Արման Սարգսյանի խոսքով՝ կողմերի լիազոր մարմիններ են հանդիսանալու Հայաստանի և Չեխիայի պաշտպանության նախարարությունները:
