Երևանի նախկին քաղաքապետ, «Ազգային առաջընթաց» կուսակցության քաղաքապետի թեկնածու Հայկ Մարությանն իր ֆեյսբուքյան էջում տեսաուղերձ է հրապարակել՝ անդրադառնալով «Քաղաքացիական պայմանագրի» կուսակցության նախընտրական քարոզարշավի եզրափակիչ երթին և միաժամանակ ափոփելով իր քարոզարշավը։
«Երթ, ելույթ, բան, ոչ մի բան կարևոր չի։ Քվեաթերթիկ համար 7»,- ասել է Մարությանն իր տեսաուղերձում՝ հրապարակմանը կից գրելով՝ «Ամենակարևորը»։
Ավելի վաղ նա հրապարակել էր ևս մի տեսնայութ՝ կիսվելով երևանցիների հետ հանդիպումներից կադերով։
«Քարոզարշավի այս օրերին եղանք քաղաքի բոլոր 12 վարչական շրջաններում, գրեթե բոլոր բակերում ու փողոցներում։ Անչափ շատ սեր ու ջերմություն տեսանք ձեզանից, սիրելի երևանցիներ։
Հիմա այդ ջերմությունն ու աջակցության խոսքերը գործողության վերածելու ժամանակն է, սիրելիներս:
Սեպտեմբերի 17-ին գնում ենք տեղամասեր ու քվեարկում ենք հանուն մեր քաղաքի ապագայի», – տեսանյութին կից գրել էր նա։
