Լեռնային Ղարաբաղի հայերը կարող էին «իդեալական աշխարհում» ապրել Ադրբեջանի իշխանության ներքո, սակայն պատմական փորձի պատճառով դա դժվար է պատկերացնել։
Արցախի դեմ Ադրբեջանի ագրեսիայից 24 ժամ անց Reuters-ին տված հարցազրույցում նման միտք է հայտնել ՀՀ փոխարտգործնախարար Պարույր Հովհաննիսյանը։
Ավելի վաղ Reuters-ը հրապարակել է Հայաստանի արտգործնախարարի մեկ այլ տեղակալ Վահան Կոստանյանի մեկնաբանությունը, որը հայտարարել է, որ «տեսականորեն» Ղարաբաղի հայերը կարող են ապրել Բաքվի իշխանության ներքո: Ավելի ուշ պարզվել է, որ գործակալությունը շփոթել է փոխնախարարին։
Այժմ արդեն Հովհաննիսյանի անունից գործակալությունը գրում է, որ Հայաստանը հասկանում է, որ Ղարաբաղի հայերը բաց են Բաքվի հետ բանակցությունների համար, եւ որ երկխոսությունը վճռորոշ նշանակություն ունի:
Նրա խոսքով ՝ Հայաստանը Ռուսաստանի հետ ունի անվտանգության կոնկրետ համաձայնագրեր, որոնք կիրառելի են նման իրավիճակների համար։
Նշենք, որ ՀՀ ԱԳՆ-ն նաեւ հայտարարել է, որ Reuters-ին մեկնաբանություն է տվել ոչ թե Կոստանյանը, այլ Հովհաննիսյանը, եւ նրա մտքերը ներկայացվել են «աղավաղված»: «Լրագրողն ընդունել է իր սխալը եւ ուղղել նյութը»,-նշել է ՀՀ ԱԳՆ-ն։
