Տարածքային կառավարման և ենթակառուցվածքների նախարար Գնել Սանոսյանը և Նազելի Բաղդասարյանը ներկայացնում են «Հումանիտար կենտրոն»-ի աշխատանքների ընթացքը:
Վերջին տվյալներով՝ Լեռնային Ղարաբաղից բռնի տեղահանված անձանց թիվը կազմում է 100 490, տրանսպորտային միջոցների թիվը կազմում է 21 103, 84 956 անձ հաշվառվել է, որը Հայաստան ժամանած անձանց 85 տոկոսն է: Արական սեռի ներկայացուցիչները 41 056 են, իսկ իգական սեռի ներկայացուցիչները՝ 43 900:
Նազելի Բաղդասարյանը հիշեցրել է, որ 100 000 դրամ միանվագ աջակցության տրամադրումը կմեկնարկի հաջորդ շաբաթ: Հոկտեմբերի 1-ի դրությամբ յուրաքանչյուր անձի հաշվարկով փոխանցվելու է նաև 40 000 դրամ բնակարանի վարձակալության գումար և 10 000 դրամ կոմունալ ծախսերի գումար՝ 6 ամիս ժամկետով:
Եվս մեկ անգամ ընդգծվել է, որ Լեռնային Ղարաբաղից բռնի տեղահանված ցանկացած անձ որևէ կարիքի դեպքում կարող է առաջնահերթ դիմել բնակավայրի պատասխանատուին կամ մարզպետարան և սեղմ ժամկետում այդ հարցին հրատապ լուծում կտրվի:
Գնել Սանոսյանը նշել է, որ 90 ավտոբուսով Հայաստան են տեղափոխվել տեղահանված այն անձինք, ովքեր սեփական փոխադրամիջոցներ չեն ունեցել և եթե անհրաժեշտ լինի, ապա ավտոբուսները կշարունակեն մեկնել Լեռնային Ղարաբաղ՝ տեղահանված անձանց Հայաստան տեղափոխելու նպատակով:
