ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը չի հստակեցրել՝ Գրանադայում սպասվող հնգակողմ հանդիպման արդյունքներով արդյոք փաստաթուղթ կստորագրվի կամ հայտարարություն կընդունվի։
Լրագրողների հետ ճեպազրույցում նա նաև նշել է, որ Հայաստանը միշտ հայտնել է խաղաղության պայմանագիր ստորագրելու իր պատրաստակամության մասին․
«Ադրբեջանն իր ագրեսիվ քաղաքականությամբ, ռազմական ագրեսիայով, միջազգային հարթակներում դիրքորոշմամբ, այս հարցում ապակառուցողական դիրք է գրավում։
Խաղաղության պայմանագրի վերաբերյալ հայկական կողմն ունի իր կարմիր գծերը, այն է՝ հարգանք Հայաստանի 29,800 քառակուսի կիլոմետր տարածքային ամբողջականության նկատմամբ՝ Ալմա-Աթայի հռչակագրի հիման վրա»։
Ըստ Խանդանյանի, Հայաստանը ցանկանում է ապաշրջափակել հաղորդակցության ուղիները, բայց իր ինքնիշխանության և իրավազորության շրջանակներում, եթե խոսքը իր տարածքով անցնող ճանապարհների և հաղորդակցության ուղիների մասին է։