ՀՀ քննչական կոմիտեի նախագահ Արգիշտի Քյարամյանը ՀՀ ՔԿ 9-ամյակին նվիրված Կոլեգիայի ընդլայնված նիստին ունեցած ելույթում ընդգծված կերպով կանգ է առել Ադրբեջանի կողմից 2021 թվականի մայիսի 12-ին Սյունիքի և Գեղարքունիքի մարզերի, 2021 թվականի նոյեմբերի 14-16-ն ընկած ժամանակահատվածում՝ Իշխանասարի և Ջերմուկի, 2022 թվականի սեպտեմբերի 13-15-ն ընկած ժամանակահատվածում՝ Ջերմուկի, Սոթքի, Վարդենիսի, Գորիսի, Կապանի, Արտանիշի, Իշխանասարի և այլ բնակավայրերի ուղղությամբ իրականացված ագրեսիայի ակտերի և դրանց հետևանքների առթիվ ՀՀ քննչական կոմիտեում քննվող քրեական վարույթների ընթացքին և արդյունքներին։
Նա նշել է, որ քրեական վարութների շրջանակներում քննության առարկա են դարձվել անհետ կորած անձանց վերաբերյալ հնարավոր բոլոր հանգամանքները:Քյարամյանը նշել է, որ միայն սեպտեմբերյան ագրեսիայի ընթացքում հակառակորդը խոցել է 150-ից ավել քաղաքացիական օբյեկտներ։
«Զննվել է 100-ից ավելի դեպքի վայր, հարցաքննվել են 4000-ից ավել վկաներ և տուժողներ, նշանակվել են 500-ից ավել փորձաքննություններ։
Պարզվել են 2021թ․ մայիսի 12-ին Գեղարքունիքի մարզի ուղղությամբ պաշտպանություն իրականացնող բարձրաստիճան սպաների, բանակային կորպուսի հրամանատարի և զորամասի հրամանատարի կողմից մարտական հերթապահության կրման կանոնների խախտման հանգամանքները, որի հետևանքով հակառակորդն անարգել մինչև 3,5 կմ խորությամբ մխրճվել է ՀՀ սուվերեն տարածք։
Մեղադրանք է ներկայացվել գեներալ-մայորի և գնդապետի կոչում ունեցող բարձրաստիճան սպաների, և որպես խափանման միջոց կիրառվել է կալանք։
Պարզվել են 2021թ․ նոյեմբերի 14-ին զինված ուժերի Իշխանասար լեռան ուղղությամբ գործող բանակային կորպուսի և զորամասի հրամանատարի, այլ սպաների կողմից մարտական հերթապահության կրման կանոնների խախտման, ինչպես նաև նոյեմբերի 16-ին նույն ուղղությամբ մարտական հերթապահություն իրականացնող մարտական երեք դիրքերի անձնակազմի կողմից մարտական հերթապահությունը ոչ ճիշտ կազմակերպելու և իրականացնելու հանգամանքները, որի հետևանքով հակառակորդը գերեվարել է 21 զինծառայողի, սպանել 3-ին։
Նշված հանցավոր արարքները կատարելու համար հանրային քրեական հետապնդում է հարուցվել բանակային կորպուսի հրամանատարի, զորամասի հրամանատարի, գումարտակի, վաշտի, դասակի, ջոկի հրամանատարական պաշտոններ զբաղեցրած ընդհանուր 10 զինծառայողների նկատմամբ։
Քննության առարկա են դարձվել նաև 2022թ․ սեպտեմբերյան ագրեսիայի ակտի ընթացքում զինված ուժերի զինծառայողների առանձին գործողությունները, որոնց վերաբերյալ նախաձեռնվել է 27 քրեական վարույթ, մեղադրանք է ներկայացվել 17 զինծառայողի, որոնցից 6-ի նկատմամբ որպես խափանման միջոց է կիրառվել կալանքը։
