Երևանի նորընտիր ավագանին գումարել է առաջին նիստը, օրակարգում քաղաքապետի, հանձնաժողովների նախագահների ընտրության և ավագանու հաջորդ նիստի ժամկետը որոշելու հարցերն են:Ավագանու նիստին մասնակցում է երեք խմբակցություն՝ «Քաղաքացիական պայմանագիր», «Հանրապետություն» և «Հանրային Ձայն»: «Մայր Հայաստան» դաշինքը և «Ազգային առաջընթաց» կուսակցությունը չեն մասնակցել նիստին:
Երևանի նորընտիր ավագանու առաջին նիստին մասնակցում է 37 անդամ, քաղաքապետի թեկնածու է գրանցվել միայն Տիգրան Ավինյանը: Քվեարկությունը բաց է և ավարտվել է, արդյունքը կհրապարակվի ընտրելու համար սահմանված մեկ ժամը լրանալուց հետո:
Ընդմիջման ժամանակ «Հանրապետություն» կուսակցության առաջին համար Արտակ Զեյնալյանը հայտնել է, որ իրավիճակը հանգուցալուծելու նպատակով «Հանրապետություն» կուսակցությունը քվեարկել է Տիգրան Ավինյանի օգտին:
