Թուրքիայի արտգործնախարար Հաքան Ֆիդանը հայտարարել է՝ եկել է ժամանակը, որ միջազգային հանրությունը լուրջ քայլեր ձեռնարկի երկու պետությունների սկզբունքի հիման վրա 1967 թվականի սահմաններով անկախ Պաղեստին պետություն ստեղծելու համար՝ Երուսաղեմ մայրաքաղաքով։ Այս մասին տեղեկացնում է Անադոլու գործակալությունը։
«Երկար տարիներ հեգեմոն տերություններն օգտագործել են լրատվամիջոցների ազդեցությունը, որպեսզի մեզ մոռացնել տան պաղեստինյան խնդրի իրական էությունը, ժամանակն է վերջ դնել դրան։ Իսրայելա-պաղեստինյան հակամարտությունը կարող է վերածվել ավելի մեծ պատերազմի, բայց դա կարող է նաև պատմական հնարավորություն ստեղծել խաղաղության համար։ Մեր նախագահը վստահ է, որ նման պատմական խաղաղություն հնարավոր է»,- նշել է նա։
Ֆիդանն ընդգծել է, որ Անկարան ամեն ջանք գործադրում է իսրայելա-պաղեստինյան հակամարտության պատճառով տարածաշրջանի երկրների՝ առաջին հերթին Լիբանանի, Եգիպտոսի և Հորդանանի ապակայունացումը կանխելու համար։
Թուրքիայի արտգործնախարարը մեկնաբանել է նաև պաղեստինյան տարածքներում հրեական բնակավայրերի կառուցումը։ «Դուք (Իսրայելը) գրավում եք ուրիշի հողը. Դուք գրավում եք տները, վտարում նրանց բնակիչներին, ուրիշներին բերում նրանց տեղը և նրանց անվանում «բնակիչներ»։ Սա կոչվում է գողություն։ Թուրքիան հզոր և փորձառու պետություն է՝ պատմական անցյալով։ Մենք ձեզ կոչ ենք անում ականջալուր լինել մեր նախազգուշացումներին»,- նշել է Հաքան Ֆիդանը:
