Էկոնոմիկայի նախարար Վահան Քերոբյանը հոկտեմբերի 18-ին ՉԺՀ մայրաքաղաք Պեկինում մասնակցել է «Գոտի և ճանապարհ» միջազգային համագործակցությանն ուղղված երրորդ համաժողովին։
Համաժողովի շրջանակում նախարարը ելույթով հանդես է եկել ենթաազգային համագործակցության վերաբերյալ «Խելացի քաղաք և քաղաքային կառավարում» թեմայով ֆորումին։
Իր խոսքում նախարարն ընդգծել է խելացի տեխնոլոգիաների կիրառման կարևորությունն ու առավելությունները։
«Հայաստանի համար առավել քան կարևոր է քաղաքային կառավարման արդյունավետ մոդելի ընտրությունը, և այս համատեքստում ՀՀ կառավարությունը որդեգրել է քաղաքային կառավարման տարբեր ոլորտներում խելացի տեխնոլոգիաների կիրառման քաղաքականություն», – նշել է Վահան Քերոբյանը։
Նախարարը նաև հավելել է, որ ՀՀ կառավարությունը նախատեսում է խելացի բաղադրիչով ծրագրեր մշակել և իրականացնել, մասնավորապես՝ էներգետիկայի, ճանապարհաշինության, շրջակա միջավայրի պահպանության, ջրային ռեսուրսների կառավարման, քաղաքացիների անվտանգության ապահովման, կրթության և այլ ոլորտներում։
