Ուրախ եմ այսօր Երևանում ողջունել իմ գործընկերոջը՝ վարչապետ Շիմոնիտեին: Սա Լիտվայից վարչապետի մակարդակով առաջին այցն է ՀՀ, ինչը վկայում է մեր հարաբերությունների զարգացման նոր դինամիկայի մասին: Այդ մասին ասաց ՀՀ վարչապետ Նիկոլ Փաշինյանը:
«Այս մասին են վկայում նաև վերջին տարիներին ակտիվացած փոխադարձ այցերը: Լիտվայի և ՀՀ-ի նախագահները 2022 և 2023 թվկաններին փոխադարձ այցեր են կատարել: 2021 թվականին ես եմ այցելել Լիտվա՝ աշխատանքային այցով: Լիտվա են այցելել ՀՀ ԱԽ քարտուղարը, ԱԳ նախարարը, ՆԳ նախարարը, առողջապահության նախարարը:
Հայաստան են այցելել նաև Լիտվայի խորհրդարանի նախագահը, փոխնախագահը, ԱԳ նախարարը, ոստիկանության գլխավոր կոմիսարը»,- նշեց վարչապետը:
Նիկոլ Փաշինյանն ընդգծեց, որ Լիտվան ԵՄ-ում Հայաստանի վստահելի գործընկերներից է:
«Մենք շնորհակալ ենք ԵՄ-ՀՀ հարաբերություններում Լիտվայի կողմից մեր հանդեպ ցուցաբերվող քաղաքական աջակցության, մեր տեսակետների և մոտեցումների հասանելիությունը և մեզ համար կարևոր որոշումների կայացմանը ԵՄ-ում աջակցելու համար»,- ասաց վարչապետը՝ նշելով, որ նման մի որոշում է Ադրբեջանի հետ ՀՀ պետական սահմանի երկայնքով քաղաքացիական դիտորդական առաքելություն տեղակայելը:
«Նախորդ օրը ես ծավալուն ելույթ ունեցա Եվրոպական խորհրդարանում, որտեղ արձանագրեցի, որ Հայաստանը պատրաստ է առավել մոտ լինել ԵՄ-ին, ինչքան որ ԵՄ-ը դա հնարավոր կհամարի:
Վարչապետ Շիմոնիտեի հետ քննարկեցինք, թե սա ինչ կարող է նշանակել գործնականում, խոսեցինք նաև ԵՄ-ում առաջիկայում կայացվելիք որոշումների մասին, որոնք վերաբերում են նաև Հարավկովկասյան տարածաշրջանին»,- ասաց Նիկոլ Փաշինյանը:
Նա Լիտվայի վարչապետին ներկայացրել է «Խաղաղության խաչմերուկի» նախագիծն ու առաջարկը, որի մասին խոսել է Եվրոպական խորհրդարանում:
Վարչապետը նշեց, որ դրա առանցքային նպատակը տարածաշրջանային հյուսիս-հարավ և արևելք-արևմուտք կոմունիկացիաների վերաբացումն ու ակտիվացումն է, այդ թվում՝ Հայաստանի տարածքով, որը Կասպից ծովը կմիացնի Միջերկրականին, Սև ծովը՝ Ծոցին:
«Սա կարող է ոչ միայն մեր տարածաշրջանի կայունության և զարգացման երկարաժամկետ երաշխիք լինել, այլև գլոբալ տնտեսական համագործակցության կարևոր օղակ դառնալ: Սա կարող է ակտիվացնել ԵՄ-Հայաստան, Լիտվա-Հայաստան տնտեսական կապերը»,- ասաց Նիկոլ Փաշինյանը:
Նա նկատեց, որ թեև վերջին տարիներին ՀՀ-ի և Լիտվայի միջև առևտրաշրջանառությունը էական տոկոսային աճ է ունեցել, բայց բացարձակ թվերը շարունակում են մնալ խորհրդանշական:
«Կարծում եմ՝ միջկառավարական համագործակցության հանձնաժողովը մտածելու բան ունի և աշխատելու մեծ ճակատ: Պայմանավորվեցինք, որ այս աշխատանքը կակտիվացնենք»,- ասաց Փաշինյանը:
Նա վարչապետ Շիմոնիտեին ներկայացրել է մեր տարածաշրջանում հաստատված վիճակը, առաջին հերթին ԼՂ-ում տեղի ունեցած էթնիկ զտումների և ԼՂ ևս 100 հազար հայերի փախստական դառնալու փաստը, ինչպես նաև նրանց հրատապ կարիքները բավարարելուն ուղղված Հայաստանի կառավարության քայլերը:
«Շնորհակալություն հայտնեցի Լիտվայի կառավարությանը և ԵՄ-ին այս հումանիտար իրավիճակին արագ արձագանքելու և ֆինանսական աջակցություն տրամադրելու համար: Մենք, իհարկե, նաև արձանագրում ենք, որ հումանիտար այս աջակցության շարունակականությունը կարևոր է»,- ասաց Նիկոլ Փաշինյանը:
Նա ընդգծել է նաև, որ Բրյուսելում Եվրոպական խորհրդի նախագահ Շառլ Միշելի միջնորդությամբ Ադրբեջանի նախագահի և իր հանդիպումների ընթացքում, ըստ էության, ձևավորվել է Ադրբեջանի և Հայաստանի միջև խաղաղության և հարաբերությունների կարգավորման ճանապարհային քարտեզ, որն արտահայտվել է նաև Գրանադայի քառակողմ հայտարարության մեջ:
«Այդ ճանապարհային քարտեզին կողմերի հավատարմությունը ճեղքում կապահովի խաղաղության գործընթացում:
Հայաստանը ինչպես հաստատել, այնպես էլ վերահաստատում է վերը նշված սկզբունքներին իր հավատարմությունը»,- նշեց վարչապետը:
