ԱԺ-ն այսօր քննարկեց «Պաշտոնատար անձանց գործունեության ապահովման, սպասարկման և սոցիալական երաշխիքների մասին» ՀՀ օրենքում փոփոխությունների նախագիծը։
ԱԳ փոխնախարար Մնացական Սաֆարյանը տեղեկացրել է, որ առաջարկվող փոփոխություններով դրույթ է սահմանվելու, ըստ որի՝ ՀՀ-ում օդանավակայանների պաշտոնական պատվիրակությունների սրահներից պաշտոնատար անձանց, նրանց ընտանիքի անդամների և պաշտոնական պատվիրակությունների օգտվելու կարգը սահմանվում է վարչապետի որոշմամբ:
Գործող օրենքով՝ հանրապետության նախագահը, վարչապետը, Ազգային ժողովի նախագահը, պաշտոնաթող Հանրապետության նախագահը, ինչպես նաև նրանց ուղեկցող ընտանիքի անդամները կարող են օգտվել օդանավակայաններում առանձնացված հատուկ սրահից:
Հիմա առաջարկվում է սահմանել, որ օդանավակայանի հատուկ սրահից կարող է օգտվել պաշտոնաթող վարչապետը։
Ըստ նախագծի՝ օրենսդրական այս կարգավորումը վերաբերվելու է միայն 2018 թվականից հետո պաշտոնաթող վարչապետերին:
