Առողջապահության նախարար Անահիտ Ավանեսյանն ԱԺ-ում ներկայացրել է բնակչության բուժօգնության և սպասարկման մասին օրենքում և հարակից օրենքներում փոփոխությունների նախագիծը, որով նախատեսվում է մասնագիտական անհատական լիցենզիաների համակարգի ներդրում։
«2023թ. հունվարի 1-ից ուժի մեջ մտավ բժշկական մասնագիտական գործունեություն իրականացնելու համար հավաստագրման պարտադիր պահանջը, որ բարեհաջող իրագործվեց։
2023թ. հունվարի 1 դրությամբ կա 35.000 բուժաշխատող, որն անցել է այդ գործընթացով, ստացել հավաստագրեր ու հաջողությամբ իրականացնում են իրենց մասնագիտական գործունեությունը։
Կարևորելով լիցենզավորման պահանջը՝ հաջորդիվ կունենանք մասնագիտական որակների, հմտությունների, գիտելիքների անընդհատ թարմացում։
Հնարավորություն կունենանք նաև բժշկական սխալների կամ էթիկական նորմերի խախտման պարագայում որոշակի վերահսկողություն ունենալ մասնագիտական գործունեություն իրականացնող բուժաշխատողների նկատմամբ»,- ասաց Ավանեսյանը։
Ըստ նրա՝ այս բարեփոխումը մեծ նախապատրաստական աշխատանքներ է ենթադրում, ուստի, անցումային դրույթներով ժամկետներ են սահմանված։