ՄԱԿ-ի գլխավոր քարտուղար Անտոնիո Գուտերեշը բոլորին կոչ է արել հեռանալ «անդունդի եզրից» և անհրաժեշտ միջոցներ ձեռնարկել, նախքան մեծ քանակությամբ մարդիկ կտուժեն բռնություններից:
«Այսօր լրանում է ՄԱԿ-ի Կանոնադրության ուժի մեջ մտնելու 78-րդ տարին: Այս կրիտիկական ժամին ես կոչ եմ անում բոլորին հեռանալ անդունդի եզրից, նախքան բռնությունն էլ ավելի շատ կյանքեր կխլի և ավելի կտարածվի», – գրել է գլխավոր քարտուղարը X-ի (նախկինում Twitter) իր էջում։
Օրը սահմանվել է ՄԱԿ-ի Գլխավոր ասամբլեայի կողմից 1947 թվականի հոկտեմբերի 31-ին և ամեն տարի նշվում է 1948 թվականից: Օրն ընտրվել է այն պատճառով, որ 1945 թվականի հոկտեմբերի 24-ին ուժի մեջ է մտել ՄԱԿ-ի Կանոնադրությունը։ 1971 թվականին Գլխավոր ասամբլեան ՄԱԿ-ի անդամ երկրներին խորհուրդ է տվել այն նշել պետական մակարդակով:
Այդ օրը կազմակերպում են հանդիպումներ, թեմատիկ միջոցառումներ, քննարկման կլոր սեղաններ, ցուցահանդեսներ, դրան է նվիրված ՄԱԿ-ի գլխավոր քարտուղարի ուղերձը։ 2023 թվականին այդ օրը համընկել է Անվտանգության խորհրդում Մերձավոր Արևելքի իրադրությանը նվիրված դռնբաց քննարկումների հետ:
