ԱԺ նախագահ Ալեն Սիմոնյանն անդրադարձել է հոկտեմբերի 27-ի վերաբացված գործին՝ ասելով, թե 1999թ.–ից շատ ժամանակ է անցել, կան ժամանակային բարդություններ։
«Բայց վստահ եմ, որ ներքուստ մենք գիտենք դրդիչներին ու այն, թե հիմնական պատճառներն ինչերն են եղել։ Ես հիմա ինձ իրավունք չեմ վերապահի դա ասել, պաշտոնիս բերումով դա կհնչի որպես մեղադրանք, բայց թե՛ «Մարտի 1»-ի, թե՛ «Հոկտեմբերի 27»-ի պարագայում հիմնական դերակատարներին, կարծում եմ, բոլորս գիտենք․ մնում է՝ այդ փաստն արձանագրվի, ու համապատասխան պատիժ լինի»,- ասել է նա։
ԱԺ նախագահը չի բացառել, որ այդ ոճրագործությունում նաև արտաքին ուժերն են շահագրգռված եղել. «Ես քննությանը ծանոթ չեմ․ ծանոթ եմ այնքանով, որքանով մնացած քաղաքացիները»։
Նա չի մանրամասնել՝ ում նկատի ունի՝ ասելով «բոլորս գիտենք մեղավորներին». «Առանց մեկնաբանության։ Չեմ ուզում որևէ կերպ ազդեցություն ունենալ քննության վրա»։
