Ուկրաինայի և Իսրայելի աջակցության ֆինանսավորումը պետք է իրականացվի առանձին, ոչ թե համատեղ փաթեթի շրջանակներում․ հոկտեմբերի 27-ին ամերիկյան Fox News հեռուստաալիքին տված հարցազրույցում ասել է ԱՄՆ-ի Կոնգրեսի ներկայացուցիչների պալատի նոր խոսնակ Մայք Ջոնսոնը:
Նրա խոսքով՝ ներկայացուցիչների պալատում հանրապետականները համաձայնության են եկել ռազմական հակամարտությունների մեջ ներքաշված երկու երկրների օգնությունը բաժանելու հարցում: Սա ենթադրում է, որ ԱՄՆ Կոնգրեսի ստորին պալատը, որի մեծամասնությունը հանրապետականներ են, չի աջակցի մի շարք երկրների 106 մլրդ դոլարի օգնության փաթեթին, որն առաջարկել էր ԱՄՆ նախագահ Ջո Բայդենը:
Այդ փաթեթի մեջ մտնում են նաև ռազմական օգնության միջոցներ ինչպես Ուկրաինային՝ Ռուսաստանի դեմ պատերազմում, այնպես էլ Իսրայելին՝ «Համաս» ահաբեկչական խմբավորման դեմ պատերազմում։ Բացի այդ, փաթեթն ուղղված է Պաղեստինի բնակչության աջակցությանը և ԱՄՆ ազգային անվտանգության ոլորտում առաջնահերթ հարցերի լուծմանը:
Սակայն ընդհանուր միջոցների մեծ մասը, այնուամենայնիվ, ենթադրվում էր հատկացնել Կիևին՝ 61,4 մլրդ դոլար՝ Իսրայելի պաշտպանության ուժեղացման համար նախատեսված 14,3 մլրդ դոլարի դիմաց։ Բայդենը կարծում էր, որ օգնության միասնական փաթեթում միջոցների ներառումը կօգնի Կոնգրեսի երկու պալատներին՝ ավելի արագ ընդունել այն․ նշում Է Reuters-ը:
