Վարչապետ Նիկոլ Փաշինյանը հայտարարել է, որ փոփոխվող աշխարհում Հայաստանի մրցունակությունն ու կենսունակությունն ապահովելու համար պետականության հայեցակարգային հիմունքները ճշգրտելն առանցքային է։
Նա հայտարարել է, որ սա կառավարության և անձամբ իր աշխատանքի կարևորագույն բաղկացուցիչներից է․
«Իմ վարչապետության՝ հանրային երջանկություններով և ողբերգություններով լեցուն հնգամյա փորձն ինձ հանգեցրել է հետևյալ հայեցակարգային ձևակերպման, որն ուզում եմ առաջարկել որպես պետական հայեցակարգային ուղենիշ: Այդ ուղենիշը հետևյալն է՝ հայրենիքը պետությունն է․ սիրում ես հայրենիքդ՝ ուժեղացրու պետությունդ»,– ասել է Նիկոլ Փաշինյանը:
Ըստ նրա՝ անկախության այս ընթացքում «մեր առանցքային հիմնախնդիրը եղել է պետության և հայրենիքի շահերի միջև առկա և շարունակաբար մեծացող լարումը, հայրենիքի և պետության ձգողականության՝ երբեմն հակադիր ուղղությունները, պետության և հայրենիքի միջև ընտրություն կատարելու անհնարինությունը»:
Նա նշել է, թե որքան էլ անհնարին լինի ընտրությունը, այն պետք է կատարվի. «Պետությունը միակ և անփոխարինելի հայրենիքն է, ու պետությունը, նրա անկախությունը, ինքնիշխանությունը, տարածքային ամբողջականությունը, ինստիտուտները կայացնելն ու զարգացնելն է հայրենասիրության գերադրական աստիճանը»,- ասել է նա։
Վարչապետի խոսքով՝ սա հասունացման ճանապարհ է, որն անցնում են կառավարությունը, խորհրդարանը, փորձագիտական հանրությունը, ժողովուրդը: