Հյուսիս-հարավ ճանապարհի Սիսիան-Քաջարան հատվածի կառուցման ծրագրի շրջանակներում հոկտեմբերի 25-ից 27-ն իրականացվել են հանրային խորհրդատվություններ։ Հիշեցնենք‚ որ հրապարակվել են Սիսիան-Քաջարան ճանապարհահատվածի կառուցման ծրագրի շրջակա միջավայրի վրա և սոցիալական ազդեցության գնահատման (ՇՄՍԱԳ) հաշվետվությունը և հարակից փաստաթղթերը‚ և այս ընթացքում՝ մինչև դեկտեմբերի 1-ը‚ շահագրգիռ կողմերի հետ կատարվում են խորհրդակցություններ։ Մասնագետները‚ հասարակական կազմակերպությունների‚ շահագրգիռ նախարարությունների ներկայացուցիչները ծրագրի պատասխանատուների և խորհրդատուների հետ մանրամասն քննարկում են ծրագրի ազդեդությունները տարածաշրջանի կենսաբազմազանության‚ պատմամշակութային ժառանգության վրա։
Մասնավորապես‚ հոկտեմբերի 25-ին կայացել է ՇՄՍԱԳ հիմնական արդյունքներին, ազդեցություններին և առաջարկվող մեղմացումներին առնչվող քննարկում‚ հոկտեմբերի 26-ին՝ ծրագրի ազդեցությունը տարածաշրջանի կենսաբազմազանության վրա‚ իսկ հոկտեմբերի 27-ին՝ ծրագրի ազդեցությունը պատմամշակութային ժառանգության վրա։ Հոկտեմբերի 27-ին ծրագրի քննարկումներին մասնակցում էին հասարակական կազմակերպությունների‚ ՀՀ ԿԳՄՍ նախարարության‚ Ասիական զարգացման բանկի, «Ճանապարհային դեպարտամենտ» հիմնադրամի ներկայացուցիչներ‚ ճարտարապետներ‚ քաղաքաշինարարներ‚ հնագետներ։ Մանրամասն քննարկվել է Սիսիան-Քաջարան կառուցվելիք ճանապարհի նախագիծը։ Նշվել է‚ որ ճանապարհի երկարությունը կազմելու է 65կմ‚ որը կրկնակի կկրճատի Սիսիանից Քաջարան այս պահին առկա ճանապարհի երկարությունը‚ համապատասխանաբար կկրճատվի նաև երթևեկության տևողությունը։ Ճանապարհի վրա կառուցվելու է 27 կամուրջ‚ 3 խաչմերուկ‚ 9 թունել և այլն։ Տեղեկացվեց‚ որ ծրագրի շրջակա միջավայրի վրա և սոցիալական ազդեցության գնահատումն իրականացվել է երկու փոլով. առաջին փուլը՝ 2016-2018թթ.‚ երկրորդ փուլը՝ 2021-2023թթ.։
Պատմամշակութային ժառանգության վրա հնարավոր ազդեցությունները պարզելու նպատակով մասնագետների կողմից ուսումնասիրվել են կառուցվելիք ճանապարհի ծրագծից 500մ աջ ու ձախ կողմերում գտնվող հուշարձանները։ Գույքագրվել են հնավայրերը‚ բնական և պատմամշակութային հուշարձանները‚ պատրաստվել է միջոցառումների փաթեթ‚ որը պետք է քննարկվի համապատասխան նախարարությունների‚ գիտամեթոդական խորհուրդների շրջանակներում։ Ընդգծվեց‚ որ Սիսիան-Քաջարան ճանապարհահատվածի կառուցման ծրագրի կարևոր բաղադրիչներից է շինարարության ընթացքում հնագիտական, պատմամշակութային հուշարձանների պահպանումը, և մինչ ծրագրի մեկնարկը պետք է հաշվարկվեն հնարավոր ռիսկերը, ազդեցությունները՝ ձեռնարկելով բոլոր քայլերը դրանք նվազագույնի հասցնելու համար։
Ուսումնասիրվել է նաև ծրագրի իրականացման արդյունքում ոչ նյութական ժառանգության վրա հնարավոր ազդեցությունը‚ և մասնագետները շեշտում են‚ որ ճանապարհի շինարարությունը կնպաստի ոչ նյութական ժաշանգության զարգացմանը‚ զբոսաշրջային հոսքերի ավելացմանը։ Ծրագրի պատասխանատուները պատասխանել են նաև քննարկումների մասնակիցների հարցերին։