Ադրբեջանի Մարդու իրավունքների պաշտպան Սաբինա Ալիևան հայտարարել է, որ ՄԻՊ գրասենյակի աշխատակիցները կանոնավոր այցելում են կալանքի տակ գտնվող Արցախի նախկին պաշտոնյաներին, որոնք «մեղադրվում են Ադրբեջանի դեմ ռազմական հանցագործությունների կատարման մեջ»։
Նա հայտարարել է, թե նրանց բոլոր իրավունքները պաշտպանվում են, նրանք հնարավորություն ունեն կապ պահպանելու ընտանիքների հետ, հայտնում է Haqqin.az-ը։
«Պետության կողմից նրանց թարգմանիչ է տրամադրվել»,-ասել է Ալիևան։
Նա նաև ասել է, որ ԵԽ հանձնակատարի Բաքու այցի ժամանակ իրենք բարձրացրել են Հայաստանում պահվող Ադրբեջանի քաղաքացիների հարցը և ակնկալում են առաջիկայում «նոր տեղեկություններ ստանալ»։
ՀՀ ԱԳՆ-ն խստորեն դատապարտել է Ադրբեջանի կողմից Լեռնային Ղարաբաղի առաջնորդների՝ Արկադի Ղուկասյանի, Բակո Սահակյանի, Արայիկ Հարությունյանի, ԱԺ նախագահ Դավիթ Իշխանյանի, նախկին պետնախարար Ռուբեն Վարդանյանի և այլոց ձերբակալությունները։
Ադրբեջանի կողմից ձերբակալվածների թվում են նաև ՊԲ հրամանատար Լևոն Մնացականյանը, փոխհրամանատար Դավիթ Մանուկյանը և ԱԳ նախկին նախարար Դավիթ Բաբայանը։
ԱԳՆ-ն հայտարարել է, որ ՀՀ-ն կձեռնարկի բոլոր հնարավոր քայլերն ապօրինաբար ձերբակալված ԼՂ ներկայացուցիչների իրավունքները միջազգային, այդ թվում՝ դատական ատյաններում պաշտպանելու համար։
