«Պետք է փորձել ամեն ինչ անել, որ ապօրինի կալանքի տակ գտնվող մեր հայրենակիցները ազատ արձակվեն։ Սա իմ համար առաջնահերթություն է այս պահին». այս մասին այսօր խորհրդարանում լրագրողների հետ ճեպազրույցում ասաց նորընտիր պատգամավոր Լևոն Քոչարյանը՝ պատասխանելով հարցին, թե ինչ է անելու պատգամավորը հատկապես այն դեպքում, երբ ընդդիմությունն իր օրակարգով չի շարժվում այս պահին։
Լրագրողի հարցին՝ հայկական Արցախի էջը փակվա՞ծ է, Լևոն Քոչարյանը պատասխանեց․
«Ինձ համար փակված չէ։ Հասկանում եմ, որ, միգուցե, շատերի համար իրատեսական չէ սա։ Ասում են՝ դե արդեն կորել–գնացել է, բայց՝ չէ․ ինձ թվում է՝ պետք է այդպես չմտածենք, պետք է փակված չհամարենք էջը ու պետք է ետ վերադառնալու ինչ-որ պատուհան ունենանք ու բացենք, որի համար շատ կարևոր է Արցախի սուբյեկտայնությունը պահելը, իշխանությունը պահել՝ որպես այդպիսին, որ Արցախի Հանրապետության քաղաքացիների պահանջն իրենց միջոցով հստակ ձևակերպվի»։
