ԱԺ պատգամավոր Արման Բաբաջանյանը գրել է.
ԱՄՆ պաշտոնյաների հետ այսօրվա հանդիպումներում առանցքայինը Հայաստանի և Ադրբեջանի միջև առաջիկա շաբաթներին՝ մինչև տարեվերջ, համաձայնության՝ խաղաղության պայմանագրի կնքմանը հասնելու հարցն է։
Ինչո՞ւ է ԱՄՆ-ը շտապում։
Հաջորդ տարին ԱՄՆ-ում ընտրական է և որևէ երաշխիք չկա, որ դեմոկրատական կուսակցությունը կկարողանա պահել իշխանությունը։
Եթե հանրապետականները 2024-ի նոյեմբերին կայանալիք ընտրություններում կարողացան իշխանության գալ, դա կարող է անդառնալի հետևանքներ ունենալ թե՛ Հայաստանի, թե՛ տարածաշրջանի, թե՛ հատկապես ուկրաինական հակամարտության համար, որը մեծամասշտաբ նշանակություն է ունենալու ամբողջ եվրասիական տարածաշրջանի և ռուս-թուրքական համաձայնությունների համար։
Պուտինը որոշել է պատերազմը Ուկրաինայում ամեն գնով երկարաձգել մինչև ԱՄՆ-ում կայանալիք նախագահական առաջիկա ընտրությունները։ Եթե հանրապետականները, մասնավորապես Թրամփը հաջողեց վերստին ընտրվել ԱՄՆ-ի նախագահի պաշտոնում և օրակարգ բերել ԱՄՆ-ի իզոլացիոնիստական քաղաքականությունը, նախկին ԽՍՀՄ բոլոր, անխտիր բոլոր երկրները պետք է մոռանան ինքնիշխան գոյության մասին։
Ինչ է պետք անել։ Պետք է շտապեն ոչ միայն ամերիկացիները, այլև մենք։ Հայաստանի իշխանությունները ԱՄՆ-ի հետ ձևավորված ինտենսիվ շփումներին պետք է հաղորդեն առավել մեծ արագություն, որակ և բովանդակություն։ Առանց ԱՄՆ-ի աջակցության, գործուն ներգրավվածության և առաջնորդության Եվրամիությունը չի կարող միայնակ հակազդել մեր ռեգիոնի ծանր քաշայիններին, և սա մեզ արագ, շատ ինտենսիվ գործելու հրամայականի առջև է դրել։
ԱՄՆ-ը, թերևս, առավել քան երբևէ ունի Հայաստանի կարիքը: Հրվ. Կովկասում իր աշխարհաքաղաքական շահերը առաջ մղելու համար ԱՄՆ-ը մեծապես և նախ հենվում է Հայաստանի վրա: Սա պատմական հնարավորություն և պատուհան է:
