Մեծ Բրիտանիան հետաքրքրված է Հարավային Կովկասում խաղաղությամբ։ Այդ մասին ադրբեջանական գործակալությանը տված հարցազրույցում ասել է աշխատանքային այցով Ադրբեջանում գտնվող Միացյալ Թագավորության Եվրոպայի հարցերով նախարար Լեո Դոքերթին։
«Իհարկե, մենք շատ շահագրգռված ենք Հարավային Կովկասում խաղաղությամբ։ Այս շաբաթ եղել եմ Երևանում, Թբիլիսիում, իսկ հիմա գտնվում եմ Բաքվում։ Մենք շատ ակտիվ մասնակցում ենք այդ գործընթացին և կարծում ենք՝ խաղաղության ամրապնդման ակնհայտ հնարավորություն կա․ աջակցում ենք դա ապահովող ցանկացած մեխանիզմի», – հայտարարել է նա։
Դոքերթին նշել է, որ խաղաղության գործընթացում կարևոր դեր են խաղում ինչպես եվրոպական երկրներն ու ԱՄՆ-ն, այնպես էլ Հայաստանն ու Ադրբեջանը, և Մեծ Բրիտանիան պատրաստ է աջակցել երկխոսությանը՝ ներկայում եզակի հնարավորություն տեսնելով երկու կողմերի համար:
Բացի այդ, ՄԹ նախարարն ընդգծել է, որ Մեծ Բրիտանիան Ադրբեջանի մեծագույն դաշնակիցն է և ամուր կապեր ունի Հայաստանի հետ: Դոքերթին նշել է, որ Մեծ Բրիտանիան պատրաստ է աջակցել Հայաստանին և Ադրբեջանին՝ համոզվածություն հայտնելով, որ կառաջնորդվեն երկրների շահերով։