«Մեզ համար տարօրինակ է, որ ամբողջ տարվա մեջ 35 մեքենա է ետ վերադարձվում, և երկու օրվա մեջ՝ ևս 35 մեքենա, այն դեպքում, երբ մատակարարները որակի մեջ որևէ փոփոխություն չեն արել». այս մասին այսօր լրագրողների հետ ճեպազրույցում ասաց էկոնոմիկայի նախարար Վահան Քերոբյանը ՝ անդրադառնալով Լարսում ստեղծված իրավիճակին։
«Մենք ԵԱՏՄ շրջանակներում հրավիրել ենք հրատապ խորհրդակցություն, որը տեղի կունենա առաջիկա երկու օրվա ընթացքում»,- ասաց նախարարը՝ նշելով, որ ուսումնասիրում են «Ռոսսելխոզնադզորի» արձանագրած խախտումները։
Անդրադառնալով քննադատություններին, թե արտահանողը չունի շուկայի այլընտրանք, նախարարն ասաց, որ արտահանողն ինքը պետք է բանակցի գնորդների հետ և իր ապրանքը վաճառի տարբեր շուկաներում. «Եթե արտահանողը մտածում է՝ քիչ ջանք գործադրելով ու ապրանքն էժան ձևով արտադրելով հնարավորություն ունենա մեծ շահույթ գեներացնել մի շուկայից և որոշում է, որ դա իրեն բավարար է, իսկ հետո բախվում է խնդրի, մենք պետք է նաև իր հետ խոսենք։ Հասկանում ենք, որ այս շուկան եկամտաբեր է և կարողանում է քիչ ջանքով շատ ապրանք վաճառել, բայց դա նաև ռիսկային է»։
