Ադրբեջանի ԱԳ նախարար Ջեյհուն Բայրամովը ԵԱՀԿ ԱԳ նախարարների խորհրդի նիստում ունեցած ելույթում անդրադարձել է հայ-ադրբեջանական հարաբերություններին։
Բայրամովը, մասնավորապես, հայտարարել է.
«Ցավոք սրտի, չնայած խաղաղությանն Ադրբեջանի միանշանակ հանձնառությանը, այս գործընթացը կրկին հետաձգվում է։ Հայաստանից ավելի քան երկու ամիս պահանջվեց խաղաղության համաձայնագրի նախագծում իր փոփոխությունները ներկայացնելու համար։
Միևնույն ժամանակ, գործընթացի վրա լրջորեն ազդել են երրորդ կողմերի կողմնակալ և միակողմանի գործողությունները։ Չնայած այս բոլոր մարտահրավերներին՝ Ադրբեջանը հավատարիմ է մնում ուղիղ բանակցությունները շարունակելուն՝ վաղաժամ խաղաղության համաձայնագրի հասնելու համար:
Մենք շարունակում ենք հավատալ, որ Ադրբեջանն ու Հայաստանը պատմական հնարավորություն ունեն՝ բարիդրացիական հարաբերություններ հաստատելու և, որպես երկու ինքնիշխան երկիր, խաղաղ գոյակցելու համար։ Դա անելու համար Հայաստանը պետք է հասկանա, որ խաղաղության ճանապարհն անցնում է երկխոսության և հարևանների հետ նորմալ հարաբերություններով:
Այլ խաղացողների կողմից սկսված աշխարհաքաղաքական ինտրիգների շարունակականությունն անարդյունավետ է, քանի որ դա միայն ծառայում է հակամարտությունը երկարացնելուն և խաղաղության ձգձգմանը»։
