Բաքուն հավատացած է, որ Ադրբեջանի և Հայաստանի միջև խաղաղ գոյակցության հասնելու պատմական հնարավորություն է ստեղծվել՝ Սկոպիեում ԵԱՀԿ ԱԳ նախարարների խորհրդի նիստում հայտարարել է Ադրբեջանի արտգործնախարարը:
Ջեյհուն Բայրամովը հերթական անգամ պնդել է, թե հենց Ադրբեջանն է նախաձեռնել Հայաստանի հետ հարաբերությունների կարգավորման գործընթացը։
Նրա խոսքով՝ Հայաստանը պետք է գիտակցի, որ խաղաղություն հնարավոր կլինի հասնել երկխոսության և հարևանների հետ նորմալ հարաբերությունների միջոցով։
«Իսկ այլ սուբյեկտների աշխարհաքաղաքական ինտրիգներն անարդյունավետ են և ձգձգում են խաղաղության գործընթացը: Որոշ երկրների կողմնակալ և միակողմանի գործողություններն էլ լրջորեն խանգարում են կայունության հաստատմանը»,- ասել է դիվանագետը։
Բայրամովը նաև հայտարարել է, թե Լեռնային Ղարաբաղում հումանիտար իրավիճակի հետ կապված մտահոգություններն անհիմն են:
Նա կրկնել է, թե իբր Լեռնային Ղարաբաղի դեմ հարձակման ժամանակ ադրբեջանական ուժերն օրինակելի են գործել և ոչ մի հայ բնակչի չեն ստիպել լքել իրենց տները:
Ադրբեջանի արտգործնախարարն իր ելույթում նաև շեշտել է, որ ԵԱՀԿ-ն կորցրել է արդիականությունը, այն նաև չի կարողացել կարգավորել տարածաշրջանում իրավիճակը:
Տարածաշրջանային, միջազգային նորությունները՝ տեսաշարում:
