Կառավարության որոշմամբ Ապարանի երկու հասցեների վթարային շենքերում բնակվող ընտանիքները կստանան նոր բնակարաններ։
Ըստ որոշման հիմնավորումների՝ այդ շենքերում այս պահին էլ բնակվում է 38 ընտանիք։ Որոշման նախագծով առաջարկվում է այդ ընտանիքներին նոր շենքում հատկացնել բնակարաններ, իսկ մնացած 5 բնակարանները տրամադրել 1988թ․ Նալբանդի երկրաշարժի հետևանքով Ապարանում բնակելի տունը քանդված (կամ քանդման ենթակա) և նախկինում բնակարան չստացած ընտանիքներին ու 2020թ․ ղարաբաղյան պատերազմում զոհվածների ընտանիքներին։
Անդրադառնալով փլուզման եզրին հայտնված վթարային շենքերի քանդմանը՝ վարչապետը պահանջեց իրեն գրավոր տեղեկանք տալ, թե երբ դրանք քանդված կլինեն։Փոխվարչապետ Տիգրան Խաչատրյանն էլ պարզաբանեց, որ 38 բնակարանից 7-ի սեփականատերերը երկրում չեն.
«Քանի դեռ որևէ մեկի սեփականությունը որևէ բնակարանի նկատմամբ գրանցված է, համայնքը քանդելու հարցում սահմանափակում կունենա»,- ասել է նա՝ շեշտելով, որ այդ բնակարանները փակ են։
«Այդ մարդիկ նույնականացված են, գիտենք, արդեն խնդրել ենք, որ համայնքը կապ հաստատի մարդկանց հետ, որոնք ՌԴ-ում են»,- ասել է նա։
