«Մեր ձեռքերին արյուն չկա, թող հանկարծ իրենց հետ չխառնեն»,- ասել է ԱԺ նախագահ Ալեն Սիմոնյանը՝ արձագանքելով «Հայաստան» խմբակցության պատգամավոր Լևոն Քոչարյանի՝ ՀՀ վարչապետին ուղղված հարցին։
Ալեն Սիմոնյանը անդրադարձել է նաև խաղաղության պայմանագրի շուրջ բանակցությունների ընթացքին.
«Ադրբեջանը փորձում է օրակարգ մտցնել հարցեր, որոնք արհեստականորեն կդժվարացնեն պայմանագրի կնքումը, և դա շատ բացասական եմ գնահատում։ Այն, ինչ մենք փոխանցել ենք ու բանակցում ենք, մենք էլ լավ գիտենք, իրենք էլ։ Անընդհատ դրա մասին խոսելն արհեստական խնդիրներ է առաջացնում»,- ասել է նա՝ անդրադառնալով նախկինում Հայաստանում բնակված ադրբեջանցիների վերադարձի մասին Բաքվի պնդումներին։
Սիմոնյանը որպես օրինակ է բերել այն, որ ՀՀ քաղաքացիները մեկնում են Վրաստան, և հակառակը, ու նման հարցեր հայ-վրացական պայմանագրերում չկան․
«Պետք է ինչ-որ ժամանակ անցնի, ադրբեջանական կողմը պետք է նվազեցնի ատելության խոսքը, որ դարձրել են իրենց բրենդը»,- նշել է նա՝ հավելելով, որ չի բացառում, երբ որոշ ժամանակ անց հայերը կգնան Ադրբեջանում ապրելու, և հակառակը.
«Ժամանակ կանցնի, ու չեմ բացառում, որ հայերը կգնան՝ Ադրբեջանում ապրելու, ադրբեջանցիները կգան՝ Հայաստանում ապրելու, առևտուր կանեն: Այո՛, խաղաղության ենք գնում, խաղաղությունն այլ կերպ չի լինում: Անգլիան ու Ֆրանսիան 116 տարի իրար հետ պատերազմել են, իրար սպանել են, բայց նրանք այսօր ամենամեծ դաշնակիցներն են»։
Ըստ նրա՝ կարելի է հասնել խաղաղության պայմանագրի, եթե Ադրբեջանի նախագահը փոխի իր հռետորաբանությունը և մասնակցի հանդիպումներին։ Նա նաև ասել է, թե Ադրբեջանը ՀՀ կողմից ռևանշիզմի չդիմելու երաշխիքները պետք է փնտրի իր մեջ. «Ռևանշիզմից վախենո՞ւմ ես, նորմալ հարաբերություններ հաստատիր անմիջական հարևանիդ հետ»։
