ԱԺ «Հայաստան» խմբակցության պատգամավոր, ՀՅԴ-ական Արմեն Ռուստամյանն անդրադարձել է Հայաստանի ու Ադրբեջանի ղեկավարների հայտարարությանը։
Ըստ նրա՝ Ադրբեջանն, այս քայլին գնալով, մի կողմից փորձում է մեղմել իր վրա ճնշումները, մյուս կողմից՝ երկկողմ բանակցությունների օրակարգ թելադրել.
«Թիվ 1 նպատակը բանակցային փակուղային իրավիճակը տեղափոխելն է իր առաջարկած բանակցային դաշտ, որովհետև իր վրա ճնշումներ կան՝ «չեք գնում Եվրոպա», «չեք գնում որևէ տեղ»։
Բանակցություններն, ըստ էության, դադարեցված էին, և ո՞ւմ մեղքով։ Այդ մեղադրանքից պետք է դուրս գար Ադրբեջանն, ու այս քայլը դրան է ուղղված։ Նաև ցույց է տալիս՝ երբ երկկողմ բանակցում ենք, ինչպիսի դրական արդյունք է լինում։ Սա կբերի խաղաղության պայմանագրի ամբողջացման, ու բանակցությունները կտեղափոխի երկկողմ ձևաչափ»,- ասել է նա։
Ռուստամյանը պնդել է, որ երկկողմ բանակցային ֆորմատը վտանգավոր է, քանի որ սա հաղթածի ու պարտվածի խոսակցություն է։
Ռուստամյանը չի բացառել, որ կարող է ստորագրվել խաղաղության պայմանագիր, բայց անորոշ ձևակերպումներով, և կողմերից յուրաքանչյուրն իր ուզածով այն մեկնաբանի։
