ԱԺ արտաքին հարցերի մշտական հանձնաժողովի նախագահ Սարգիս Խանդանյանը հայտարարել է, որ նոյեմբերի 9-ի հայտարարության սկզբունքային կետերը՝ կապված Լեռնային Ղարաբաղի հայերի անվտանգության ապահովման հետ, չեն իրականացվել, խափանվել են, և այստեղ լեգիտիմ հարցեր և մտահոգություններ են առաջանում։
Նա հիշեցրել է, որ այդ հայտարարության երաշխավորող կողմը ՌԴ-ն է եղել․
«Կա բանակցային որոշակի տրամաբանություն և գործընթաց։ Շատ կարևոր է, որ բանակցությունները կրկին չվերադառնան զրոյական կետի։ Հայկական կողմը միշտ պատրաստ է բանակցությունների․ Ադրբեջանն է խուսափում դրանից»,- նշել է նա։
ԱԺ ՔՊ խմբակցության քարտուղար Արթուր Հովհաննիսյան էլ հավելել է, որ վստահությունը բխում է իրողությունից. «Հարթակների հետ կապված՝ նշել ենք, որ Հայաստանի համար առաջնայինն այն է, որ սկզբունքները պահպանվեն այն հարթակներում, որտեղ տեղի կունենան բանակցությունները։
Սկզբունքները, հիշեցնեմ, տարածքային ամբողջականության ճանաչումն է, ճանապարհների ապաշրջափակումը՝ սուվերենության սկզբունքով։ Այս սկզբունքների պահպանության դեպքում մենք չենք տարանջատում հարթակները»,- ասել է նա։
Հովհաննիսյանը հարցին՝ չի՞ նշանակում, որ ՀՀ-ն ՌԴ-ին դուրս է մղում հայ-ադրբեջանական հարաբերությունների կարգավորման հարցից, ասել է.
«Մենք որևէ մեկին որևէ տեղից դուրս չենք մղում։ Եթե պրոցեսների ընթացքում ինչ-որ գործընկերներ դուրս են մղվում կամ չեն մասնակցում որևէ խոսակցության, չի կարելի մեկնաբանել, թե մենք ենք դուրս մղում»։
