Իրանի և Ռուսաստանի արտաքին գործերի նախարարներ Հոսեյն Ամիր Աբդոլլահիանն ու Սերգեյ Լավրովը հեռախոսով քննարկել են տարածաշրջանային օրակարգի հարցեր, այդ թվում ՝ պաղեստինա-իսրայելական հակամարտության գոտում տիրող իրավիճակը: Այս մասին հայտնել է Իրանի ԱԳՆ-ն։
Կողմերը քննարկել են Իրանի նախագահ Իբրահիմ Ռաիսիի՝ Մոսկվա կատարած այցի արդյունքները, որտեղ նա բանակցություններ է վարել իր ռուս գործընկեր Վլադիմիր Պուտինի հետ: Այս համատեքստում Աբդոլլահիանն ընդգծել է երկու երկրների բարձրաստիճան պաշտոնյաների միջև խորհրդատվությունները շարունակելու անհրաժեշտությունը: Հայտարարության մեջ նաև ասվում է, որ Լավրովը կարևոր է համարել Ռաիսիի և Պուտինի՝ վերջերս կայացած հանդիպումը:
