Իսրայելական անօդաչուները հրթիռներ են արձակել Բեյրութի հարավային արվարձանում գտնվող ՀԱՄԱՍ-ի կենտրոնակայանի ուղղությամբ:
Քանդվել է եռահարկ շինություն: Լրատվամիջոցների տվյալով՝ զոհվել են ՀԱՄԱՍ-ի քաղբյուրոյի ղեկավարի տեղակալ Սալեհ ալ Արուրին, ՀԱՄԱՍ-ի մարտական թևի երկու հրամանատար և այլ անձինք:
Լիբանանի վարչապետի պաշտոնակատար Նաջիբ Միքաթին կոչ է արել բոլոր շահագրգիռ կողմերին ճնշում գործադրել Իսրայելի վրա, ստիպել դադարեցնել հարձակումները Լիբանանի վրա:
Նրա խոսքով՝ Իսրայելի նպատակը Լիբանանը ռազմական առճակատման մեջ ներքաշելն է՝ ի հեճուկս դրա կանխման ուղղությամբ գործադրվող ջանքերի: Միքաթին հանձնարարել է անհապաղ բողոք ներկայացնել ՄԱԿ-ի Անվտանգության խորհուրդ Իսրայելի կողմից Լիբանանի ինքնիշխանության խախտման վերաբերյալ:
Իսրայելի վարչապետի ավագ խորհրդական Մարկ Ռեգևը հայտարարել է, որ Բեյրութի արվարձանում ՀԱՄԱՍ-ի ղեկավարի տեղակալի սպանությունը հարձակում չէր Լիբանանի վրա և նույնիսկ «Հեզբոլլահի» վրա. դա «վիրաբուժական հարված» էր պաղեստինյան խմբավորման ղեկավարությանը:
