Դատախազությունը պահանջում է կրկին կալանավորել փողերի լվացման համար մեղադրվող գեներալ-մայոր Գրիգորի Խաչատուրովին։
ՀՀ գլխավոր դատախազությունից Radar Armenia-ին հայտնել են, որ վճռաբեկ բողոք է ներկայացվել՝ պահանջելով բեկանել Գրիգորի Խաչատուրովի նկատմամբ ընտրված խափանման միջոց կալանավորումը գրավով և վարչական հսկողությամբ փոխարինելու մասին վերաքննիչ հակակոռուպցիոն դատարանի որոշումը և Խաչատուրովի նկատմամբ որպես խափանման միջոց կիրառել կալանավորումը։
Գաղտնիք չէ, որ արդարադատության համակարգից սպասումներն ամենապահանջատիրականն են հասարակության շրջանում, և որքան էլ համակարգային բարեփոխումների վերաբերյալ ժամանակ առ ժամանակ տարբեր ցուցանիշներ ներկայացվեն՝ հանրության շրջանում կան ավելի բարձր հնչեղության գործեր, որոնց դեպքում ձախողելն էլ, հաջողելն էլ այլ ռեզոնանս են առաջացնում։ Հետևաբար՝ գոնե նման գործերում համակարգը պետք է դատական վճռի հասնելու ավելի սեղմ ժամկետներ կիրառելու գործիքակազմ ունենա։
Այլապես ամեն անգամ կալանավորելը, ապա ազատ արձակելը, ապա նորից կալանավորելու բողոքը նվազեցնում են դատական համակարգի նկատմամբ հանրային վստահությունը։ Խաչատուրովի գործը ամենահնչեղներից է, և դատավճիռը՝ ամենասպասվածը։
