Պետական եկամուտների կոմիտեում նախատեսվում է ներդնել վարձատրության նոր համակարգ` հիմնված կատարողականի գնահատականի վրա։ Ազգային ժողովում համապատասխան նախագիծը ներկայացրեց ՊԵԿ նախագահ Ռուստամ Բադասյանը։
«Այս նախագծով ներդնում ենք կատարողականի գնահատման ընթացակարգ Պետական եկամուտների կոմիտեում։
Գիտեք, որ անընդհատ քննարկվում է, թե ինչ սկզբունքով է պետական ոլորտում վարձատրությունը որոշվում, և մենք որոշել ենք գնալ առաջավոր և միջազգային փորձով, ինչը ենթադրում է կատարողականի գնահատական և դրա հիման վրա հարկային կամ մաքսային ծառայողի վարձատրության արդար համակարգ։
Նախագծի նպատակն է, որպեսզի պետական եկամուտների կոմիտեից մասնագետների արտահոսքը դադարեցվի․ շատ աշխատակիցներ մասնավոր ոլորտում շատ ավելի բարձր աշխատավարձով աշխատանքի հնարավորություն են ստանում և, որքան էլ նվիրված լինեն հարկային կամ մաքսային ծառայությանը, ինչ-որ պահի այնքան է վարձատրությունների դիսբալանսը բարձր լինում, որ որոշում են կայացնում և տեղափոխվում մասնավոր ոլորտ, ինչը բացասական է ազդում թե՛ հարկային, թե՛ մաքսային վարչարարության վրա։
Եվ մենք մի քանի ճանապարհ ենք ունեցել՝ ուղղակի բարձրացնել աշխատավարձը կամ դնել կատարողականի գնահատման արդյունավետ համակարգ։ Որոշում ենք կայացրել երկրորդի օգտին, որովհետև դա արդար վարձատրության մեխանիզմ է»,- ասաց Բադասյանը։
ՊԵԿ նախագահը ներկայացրեց կատարողականի գնահատման արդյունավետ համակարգի վարձատրության մեխանիզմը։
«Մենք կատարողականի մի մասը գնահատում ենք, թե աշխատակիցը ինչ վերապատրաստում ու պատրաստում է անցել, և երկրորդ՝ գնահատում ենք կոնկրետ վարչարարության արդյունքը՝ կախված ՊԵԿ-ի առջև դրված նպատակներից»,- ասաց Բադասյանը։
