Վաղը լրանում է Ադրբեջանի արտահերթ նախագահական ընտրությունների համար զորամասերի, քննչական մեկուսարանների և քրեակատարողական հիմնարկների տարածքներում ստեղծված ընտրատեղամասերի ընտրացուցակների թարմացման համար նախատեսված ժամկետը։
Ինչպես հայտնում են ադրբեջանական ԶԼՄ-ները, ընտրական օրենսգրքի համաձայն՝ տեղամասային ընտրական հանձնաժողովները քվեարկության օրվանից ոչ ուշ, քան 20 օր առաջ՝ հիմնվելով ընտրողների մասին զորամասերի հրամանատարների, քննչական մեկուսարանների և քրեակատարողական հիմնարկների ղեկավարների կողմից ներկայացված տվյալների վրա, պարտավոր են ապահովել ընտրացուցակների հստակեցում (զորամասերում զինծառայողներ, զորամասերի տեղակայման տարածքի սահմաններում բնակվող զինծառայողների ընտանիքներ, քննչական մեկուսարաններում պահվող մեղադրյալներ, քրեակատարողական հիմնարկներում պատիժ կրող կալանավորներ և այլ ընտրողներ) զորամասերի, քննչական մեկուսարանների և քրեակատարողական հիմնարկների տարածքում ստեղծված ընտրատեղամասերում։
Ինչ վերաբերում է արտահերթ նախագահական ընտրություններին, ապա նշված ժամկետը ընդգրկում է մինչև 2024 թվականի հունվարի 18-ն ընկած ժամանակահատվածը։
