Իրանի և Թուրքիայի նախագահներ Իբրահիմ Ռայիսին և Ռեջեփ Թայիփ Էրդողանը կարծում են, որ մերձավորարևելյան տարածաշրջանում լարվածության աճը և Կարմիր ծովում անվտանգության հետ կապված իրավիճակը Իսրայելի իշխանությունների գործողությունների արդյունք են: Այս մասին ասվում է Ռայիսիի՝ Անկարա կատարած այցի արդյունքներով համատեղ հայտարարության մեջ․
«Երկու երկրների նախագահները, ընդգծելով տարածաշրջանային և միջազգային ջրերում, այդ թվում՝ Կարմիր ծովում նավագնացության անվտանգության ապահովման կարևորությունը, նշել են, որ Կարմիր ծովում ներկայիս իրադրությունը իսրայելական ռեժիմի ագրեսիայի արդյունք է, և հայտարարել են, որ տարածաշրջանում իրադրության կարգավորման համար անհրաժեշտ են վճռական միջոցներ Իսրայելի հանցագործություններին հակազդելու համար», – նշված է Իրանի կառավարության կայքում հրապարակված հայտարարության մեջ:
