«Ոչ միայն Չեխիան, այլև մեր բոլոր միջազգային գործընկերները պետք է հնարավորինս ճնշումներ գործադրեն տարածաշրջան խաղաղություն բերելու հարցում»,- այս մասին հայտարարել է ԱԺ նախագահ Ալեն Սիմոնյանը՝ Չեխիայի խորհրդարանի նախագահ Մարկետա Պեկարովա Ադամովայի հետ համատեղ ասուլիսում։Նրա խոսքով, Հայաստանը բազմիցս հանդես է եկել տարածաշրջանում երկարատև խաղաղություն հաստատելու համար.
«Բայց մեր հարևան երկիրն այդքան աչքի չի ընկնում, և միջազգային հանրությունը պետք է հստակ արձագանքի այն բոլոր քայլերին, որ ուղղված են այդ խաղաղությունը հաստատելու տապալմանը»,- ասել է նա։Սիմոնյանը մատնանշել է, որ Ադրբեջանը բազմիցս հրաժարվել է հանդիպումներից.
«Ինձ մոտ տպավորություն է, որ Ադրբեջանը հատուկ ժամանակ է ձգում՝ խաղաղության գործընթացն ավարտին հասցնելու հարցում այն պարագայում, որ քաղաքական ցանկության դեպքում չեմ տեսնում որևէ կտրուկ պատճառ, որ կարող է խանգարել խաղաղության համաձայնագիրը համաձայնեցված սկզբունքների հիման վրա իրականացնելուն»։
Մարկետա Պեկարովա Ադամովան էլ ասել է, թե Չեխիայի համար նպատակ է ունենալ բարգավաճող, խաղաղ երկրներ.
«Չեխիայի համար նպատակ է ունենալ բարգավաճող, խաղաղ երկու երկրներ, մենք միանագամայն աջակցում ենք երկրների ինքնիշխանությունը, բայց միևնույն ժամանակ լավագույն շրջանակը կլինի աջակցել երկրներին միջազգային մակարդակում, միջազգային համագործակցության շրջանակում։ Մեր հաջորդ այցը Բաքուն է, և մենք ցույց կտանք մեր աջակցությունը հայ ժողովրդին»,- ասել է նա։