Էկոնոմիկայի նախկին փոխնախարարը ձերբակալվել է

ՀՀ քննչական կոմիտեից Radar Armenia-ի հետ զրույցում անդրադարձել են ՀՀ էկոնոմիկայի նախարարությունում իրականացվող ստուգումներին։

«ՀՀ քննչական կոմիտեի Պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչությունում և Հատուկ հանձնարարություններով գլխավոր վարչությունում իրականացվող երկու տարբեր քրեական վարույթներով ՀՀ Քննչական կոմիտեի քննիչների և ՀՀ ազգային անվտանգության ծառայության աշխատակիցների կողմից համատեղ իրականացվում են անհետաձգելի քննչական և այլ դատավարական լայնածավալ գործողություններ, այդ թվում՝ ՀՀ Էկոնոմիկայի նախարարությունում և մի շարք անձանց բնակարաններում՝ ընդհանուր առմամբ ավելի քան 15 վայրերում, կատարվում են խուզարկություններ:

Մանրամասների մասին ըստ անհրաժեշտության կտրվի լրացուցիչ տեղեկատվություն»,- հայտնեցին ՔԿ-ից:

Այս գործի շրջանակներում ձերբակալվել է ՀՀ էկոնոմիկայի նախկին փոխնախարար Անի Իսպիրյանը։